Lembur Kuring Karang Pamidangan

“Kar, naha nya ari bata beureum, kahitutan hejo?” kuring nanya ka Ki Sobat anu harita keur anteng lalajo basket di buruan sakola.
“ Nu bener Ren?” manehna ngajawab saregep naker, atuh panon kuring ge cul we ka Si Honey mah,nu keur anteng lulumpatan mamawa bal di lapang basket, asupkeuneun kana ring .
“ Teu percaya? Pek we buktikeun!” cekeng daria naker.
Bet ku teu sangka atuh, kojengkang manehna ka pipir bari ngenyang leungeun kuring, kop nyokot bata nu ngentep gigireun tembok sakola. Kuring tangka titatarajong nuturkeun manehna nu lumpat bari nyenyekel leungeun kuring..
“Tempo nya! “ omongna bari gog cingogo luhureun bata, sedut-sedut si bata dihitutan. Geus kitu tuluy dipelong. Kitu jeung kitu we kalakuanana teh, aya kana tilu kalina. Kuring ukur neuteup hareugeuun.
“ Ukar, ari maneh nanaonan..jiga nu teu hideng? Lieur siah urang mah ngambeu hitut maneh!”
“ Ah puguh Ente nu teu baleg mah! Gede wadul dibeakeun ku sorangan. Eta katingali gening mana buktina, pajar ceuk Ente,bata beureum mun kahitutan bakal hejo. Buktina? Dibekok ku urang sababaraha kali angger we beureum!”
Si Ukar morongos tangka buncelik panonna, pedah asa dilejokeun ku kuring. Atuh cakakak kuring seuri kuat ka bijil cipanon. Teu nyangka pikiranana bakal nepi ka dinya.
“ Ukar..Ukar, urang mah tara ngabohong. Hayu urang buktikeun ari hayang jelas mah!” cekeng bari panon mah rarat-reret neangan daun kahitutan dina sela-sela gomplokna Ki Beling nu jadi pager sakola. Kabeneran manggih. Pit we mipit sagagang.
“ Tempo kadieu Kar. Tah ieu bata nu tadi tea nya, pulasna naon?” pok teh bari ngacungkeun bata ka hareupeunana.
“ Beureum! “ pokna tandes.
“ Ari ieu naon? Pulasna kumaha?” cekeng bari ngasongkeun daun kahitutan beunang metik tina sela-sela Ki Beling tea.
“ Heuuuyy..nya eta mah kahitutan , jelas atuh pulasna hejo! ‘ omongna bari kerung….
“ Jadi bener pan sakumaha ceuk Urang, bata beureum ari kahitutan mah hejo?”Hayoh jawab lain olohok!”
Barakatak manehna seuri meni nyakakak…
“ Reniiiiiiiiiiiii Ente nu pinter aing nu bodoooo…rek nepi ka iraha siah ngeleg wae ka uiiiing…” ceuk manehna bari kek kana leungeun rek ditewak , kuring geuwat ngagiwar, mun teu kitu , geus moal salah kana diparieuskeun ieu leungeun leutik teh…
Ah..carita di luhur teh carita puluhan taun ka tukang jaman kuring jeung manehna sakola di SPGN Cimahi. Kahudang deui teh pedah tadi narima telepon, teu sangka Ki Sobat Ukar Sukarya nu nelepon teh, ngabejaan manehna rek hajat. Omat cenah kuring sakulawarga kudu datang da kacida pisan sonona.
Teu kacipta kumaha ke mun tepung deui jeung manehna. Sobat nu kacida bageurna, kacida belana, kacida satiana sarta kacida pisan polosna. Kuring sabatur-batur mindeng dihukum guru lantaran cilaka ku kapolosanana. Ayeuna kari waasna, ceuk beja manehna geus jadi inohong..Can nanaon ge kuring geus ngabelenyeh sorangan….Inget kana omongan manehna dina telepon, asa euweuh harib-harib gaya inohong. Angger we Ukar Sukarya…..Paur ngabekok deui we kuring mah…Ah rek taki-taki lumpat we mun kitu teh.

Tengah poe, Si Kabayan nguniang hudang dan teu kuat beuteung lapar. Karayap kana meja makan tapi kacida ngajenghokna waktu muka tutup meja, di jerona teh ngan ukur aya bal plastik we hiji ngajentul dina piring.

Gawawak nyalukan Si iteung nu keur anteng sili siaran jeung tatanggana.

Kabayan : Iteung! Ari sia geus teu eling..piraku aing kudu ngadahar bal?

Iteung : Na make jeung nyebut teu eling sagala, nya eta dahareun nu aya. Teu kudu loba omong rek
dahar mah dahar we naon hesena!

Kabayan : Pek atuh contoan ku sia kumaha cara ngadaharna…

Iteung : Sangeuk teuing aing mah teu beuki bal..!

Kabayan : Sarua aing oge teu beuki!

Iteung : Endeuuuhhh…wadul siah! Sakitu unggal peuting lalajo parat-parat nepi ka subuh teh!
Tibeurang ngaguher nepi ka poho usaha, geus puguh kana ibadah mah cul laur pisan.
Batur mah ieuh, rek lalajo nepi ka nolol panon ge da baroga usaha, baroga gajih bulanan
Ari urang rek dahar ti mana mun teu usaha? Matak wayahna poe ieu mah geus koredas
euweuh nanaon. Lapar mah eta wae bal plastik gegelan!

Dikitukeun mah Si Kabayan ngahuleng teu bisa ngajawab deui…..Rumasa kajongjonan teuing lalajo World Cup nepi ka poho kana usaha, bet inget ka Ki Alnasan..enya nu kieu teh Gozul Fikri tea meureunnya…

Jaman baheula di Basisir Sumatra Barat aya hiji karajaan anu subur makmur loh jinawi, teu aya kakurangan naon-naon estu ning matak pikabitaeun karajaan –karajaan tatanggana. Ari nu matak pikabitaeunana mah nyaeta ku kabijaksanaan rajana anu tara pilih kasih. Upama aya rahayat anu boga kasalahan, dina nibankeun hukuman teh sok sarua bae, satimpal jeung kasalahanana, sanajan ka kulawarga raja oge taya bedana. Kitu deui lamun ka nu nyieun kahadean ka nagara sok disaruakeun hadiahna , boh mangrupa barang atawa naon wae, dihadiahanana teh saimbang jeung kahadeanana. Atuh Anjeunna sering nyamur ka pasisian jadi rayat biasa, pikeun nalungtik bisi rayatna aya kakurang sandang atawa panganna, bisa ditulungan.

Tapi sok aya-aya wae gangguanana ka nagara anu keur subur makmur teh. Hiiji waktu aya mamala anu kacida gedena, nyaeta aya hiji manuk gede naker kakalayangan, suat-siet nyirorot nyamberan jalam-jalma anu aya di pasar, bari terus teu bisa ampun jalma teh diranggeum tuluy diselewegkeun. Tingkoceakna jalam-jalma estu matak ketir sabab ray beurang-ray beurang teh terus-terusan disamberan.

Kusabab unggal poe kitu jeung kitu, atuh rayat teh tinggal saeutik. Nya tuluy we diparentahkeun supaya rayat nyarumput ka leuweung. Di leuweung rahayat caricing di guha atawa di jero taneuh anu ngahaja dijieun lombang atawa torowongan . Ngan Nyi Putri putra raja, ditempatkeun dina guha anu istimewa, dibaturan ku hiji ucing kakasihna.

Ari manuk gede tea? Nya angger apaleun, lantaran kaambeueun bau manusa. Nya terus bae ka leuweung oge disusul disamberan, nepi ka raja sareng prameswari oge teu tinggaleun jadi mangsa manuk gede tea.
Anu tinggal teh Nyi putri wae, cuang-cieung kadua ucing dina jero guha. Kumaha sedihna Nyi Putri bisa kacipta, tapi salian ti ucing teh sok aya anu ngulampreng maturan dina guha teh nyaeta putri beurit anu nyicingan eta guha. Ku mindeng-mindengna papanggih nya putri teh jadi wawuh, jadi batur pikeun pakumaha. Nyi Putri nyoba-nyoba menta tulung.

“ Cing atuh putri beurit, kuring tulungan, pangmaehankeun manuk gede,” cenah

Jawab putri beurit “ heuh kuring daek da kuring mah loba baladna, asal….
”
“ Asal kumaha?’ ceuk Nyi Putri heran

“ Ah eta wae kuring mah embung nulunganana ari boga saingan mah”

“ Saha?”

“ Eta tea batur Nyi Putri, ucing”

“ kumaha lamun eta ucing ku Nyi Putri singkirkeun heula”

Nyi Putri ngagebeg, da kacida nyaaheunana ka ucing teh. Tapi lantaran teu aya jalan sejen, terus wae ucing teh digeroan. Anu titadi oge eta ucing teh ngadengekeun omongan beurit sacerewelena. Tuluy wae ucing teh dititah indit ku Nyi Putri, da cenah ayeuna mah geus aya gantina beurit anu rek nulungan. Ari beurit kalah der deuih ngagogoreng ucing, pajar teh ucing mah teu aya gunana, dikukut ge kajahat-jahat dahareun cenah.

Atuh ucing teh katurug katutuh, nya dititah indit ti Nyi Putri nya difitnah ku beurit, kacida nalangsana, kacida keuheuleunana ka beurit tapi da teu aya kakuatan nanaon salian ti ngageremet dina hatena. Ti harita manehna boga tekad satuturunanana rek ngamusuhan ka beurit.

Kacaritakeun manuk gede tea, galabar geleber terus neneangan Ny Putri. Kitu jeung kitu unggal poe. Lantaran capeeun, nya eureun ngudupruk hareupeun guha. Putri beurit teh siap jeung kabeh rayatna ngagurumut manuk gede tea anu keur hees kusabab mopo balas kakalayangan neangan Nyi Putri. Ahirna mah manuk teh teu bisa hiber, nepi ka paehna, bangkena ledis diharakanan ku beurit. Kitu tah dongengna teh, nepi ka ayeuna ucing keuheuleun sarta jadi musuh beurit. Cag ah…

Lihat Kartu Ucapan Lainnya
(KapanLagi.com)

Panggih jeung Ki Adi teh ku alpukahna Si Akang, nepungkeun di dunya maya.
Dunya nu legana ngaleuwihan nusantara , parat ngambah jagat raya,
anu ku itungan waktu baheula mah jigana pamohalan bisa ngambah dunya
dina waktu anu kacida singketna. Teu kitu gening ku pesatna teknologi mah,
contona wae kuring bet bisa tepung jeung Ki Adi anu mukim di Texas.

Kumaha atuh eta teh dongengna? Nya ari mimitina mah kitu we,
ti saprak internet asup ka sakola kuring dina taun 2003, kuring sok pirajeunan
muka YM, mimitina mah sok neangan batur carekaneun di room sugan we aya
nu bisa diajak pasea..he..he..he…biasa ari keur ribut jeung dunungan teh,
kuringmah sok murang-maringna di room. Angkanan teh sabodo teuing
da di room mah euweuh jelema nu wawuh atuh ngomong oge bisa saheuayna.

Pang resepna mun aya jelema kasinggung, tuluy asup kana PM kuring,
der nyarekan ngajak pasea, laahh justru eta nu dipiharep. Da ari pasea di alam nyata mah…matak geunjleung dunya..piraku aya guru pasea, kumaha muridna atuh.

Kalakuan kitu teh kapanggih ku Ki sobat, Ki Ate Kartiwan ( almarhum ),
kuring dicarekan pokna teh

“ Cing atuh Ontohod kalakuan teh ulah ngerakeun almamater
kawas lain guru wae Ente mah!Batur mah muka YM teh neangan babaturan
ieu mah kalah der neangan musuh”

“ Kuma uing we, nu nulis dina screen leungeun-leungeun uing, usilan teuing barina ge!
Dari pada ngobrol teu uni, ngagombalan batur, mending ngajak pasea!”
jawab teh dapon engab.

“ Sarua we teu balegna pasea oge! Yeuh..nu diajak pasea teh jelema, najan teu katempo bungkeuleukannana oge! Maranehna boga rasa, boga pikiran! Dari pada kikituan mending nyieun blog, kapan Ente mah resep nulis lain?”

Eta omongan Ki Ate nyerep kana hate kuring, atuh ti harita kuring diajar nyieun blog,
enya we resep boga blog teh, komo mun pareng loba anu ngomentaran mah.Tah ti harita, eureun weh maseaan batur di room teh, malah ID oge diganti ku ngaran asli, atuh babaturan oge lolobana mah nu sok ngomentaran dina blog wae tara neangan deui ka room.

Di antara para komentator, aya saurang anu rada munel eusina ,
memper-memper kana filsafat. Sakapeung seukeut matak peureus,
sakapeung bebeakan muji kana tulisan kuring . Ah panasaran tuluy we
ID na di add, horeng manehna teh dosen di hiji paguron luhur nu geus kasohor.
Paingan atuh beda ti batur dina ngomentaranana.

Teu sangka Ki dosen anu someah teh gening misobat, ngaakangkeun
padahal umurna sahandapeun kuring. Nya ti Si Akang kuring wanoh jeung Ki Adi teh.
Eta cenah ceuk Si Akang teh “ Teh Ren, Sist Nety mah bageur pisan, someah ka sasaha , henteu ieu aing uyah kidul sanajan sagala aya oge “

Ari ku kuring kalah pok dijawab kieu
“ Nya enya atuh, piraku deui rek asa aing uyah kidul apan Ayi Nety mah ti kulon,
ti Banjar pan? “

“ Hih ieu mah dibejaan teh! “ Si akang ukur nyarita kitu,da nya eta ngobrolna
dina screen tea, da mun seug pajonghok mah jigana kana diteke kuring teh, bongan pikasebeleun.

Enya we sakumaha ceuk Si Akang, Ayi Nety teh someah pisan,
galecok ari ngobrol sanajan langka tepung da kuring jarang ol
tapi ari pareng amprok dina PM teu weleh misono. Malah teu ukur kitu,
kuring diajarkeun nyieun blog tina multiply sagala, ngan kusabab kuringna
hese ngarti gancang poho matak pusing nu ngajar, tuntungna mah
diapangnyieunkeun weh blog teh,meni alus jeung artistik, hanjakal kuringna joledar ngaropeana, da eta atuh boga blog teh salima-lima matak lieur ngeusianana.
Antukna , Talaga Wening mah kaluli-luli, lain teu narimakeun ka nu merena,
ngan eta ku kariweuh tea. Jeung apan ari multiply mah teu basajan jiga blogsome
atawa word press, ceuk kuring nu gaptek, da ari ceuk nu pinter mah
teu aya nu hese sagala oge.

Kuring asa boga adi, lamun pareng Si Ayi sedih kuring sok milu ceurik
atuh sabalikna mun pareng keur meunang kabagjaan, hate teh sok milu bungah.
Asa aya nu sarua dina diri kuring jeung Si Ayi, duka lebah manana,
jigana mah lebah lalakon hirup jeung adat-adatan Asa aya anu sarua,
sanajan teu nyeples oge. Nya kusabab eta kuring sok nyawang,
kumaha mun tepung dina kieuna, naha bakal sarua sikepna,
bakal sarua galecokna? Atawa bakal sabalikna?

Ku teu sangka Si Ayi ngabejaan pajar lebaran taun ieu mah rek mulang ka Indonesia,
atuh puguh kacida bungahna narima beja teh. Cunduk waktu, kuring kudu datang
dina acara milangkalana, nu diayakeun di Restoran Sindang Reret.
Geus diajam ti anggalna, sanajan rek bentrok jeung acara naon oge,
kuring rek maksakeun hadir, malah lamun perlu mah rek mentingkeun pisan
sabab apan teu taun kali bisa tepung jeung Si Ayi.Komo ieu mah Si Ayi na oge
omat-omatan kuring kudu datang jeung salaki

Dina waktuna, enya wae acara teh padet pisan.
Poe saptuna acara halal bihalal guru-guru di villa bogana kepsek,
biasa ngadon ngaruseup jeung balakecrakan, ti isuk parat nepi ka sore.
Ari poe mingguna tanggal 4 Oktober jam 8 aya acara halal-bihalal alumni,
terus bada lohor aya acara halal-bihalal kulawarga besar ti bapana,
bari sakalian muka arisan anyar. Teu ku hanteu anu tadina rek rurusuhan teh
kalah der kapeto jadi ketua arisan. Atuh puguh teu bisa balik ti heula
da kudu ngumpulkeun duit jeung muka arisan heula, malah kudu biantara sagala
..Laahhh ieu mah keur rusuh teh, eta ge kuring tamaha, ulah kuring nu kapeto
jadi ketuana, ngan hih, da teu dihiding, kabeh dulur sapuk nyatujuan kuring kudu
jadi ketua, teu bisa minge, tuntungna mah ditarima bae bari sajero ngumpulkeun
duit teh panon mah, ret deui-ret deui kana jam nu ngadaplok.
Teu kitu kumaha apan ondangan Si Ayi teh pukul 4 sore.
Ari ieu pukul 3.15 masih aya keneh di Cisarua.

Alhamdulilah acara lekasan, pukul 4 sore geus aya di imah,
rurusuhan mandi da awak asa bayeungyang, beres solat mah
jung we miang jeung bapana. Enya wae tepi ka tempat acara teh kasorean.
Sok samar polah kuring mah mun datang telat teh, ret kaditu ret kadieu neangan
Si Ayi, nu mana atuh teu katingali, da gening loba tamuna ,
peuntaseun meja katingali aya Si Akang keur nyerengeh…digupay we,
bari terus neangan tempat diuk nu masih kosong. Panon mah ngulincer
neangan Si Ayi, na di mana atuh, tuluy nanyakeun ka nu diuk hareupeun, aya cenah.

Na atuh ana keur kitu solongkrong aya nu nyampeurkeun
sugan teh mojang ti mana, gening Si Ayi! Gusti..pangawakan jangkung lenjang,
kulit umyang, pameunteu bear marahmay, amis budi ,someah darehdeh pisan,
sakitu anyar pinanggih tapi teu jiga nu anyar wawuh. Dunya barana nu nyipuh dirina
teu ieuh jadi umaing. Eta ku teu jiga lila di Texas, estu ieu mah Sunda pituin,
dina lentong dina basa estu nyunda pisan, sanajan aya Amerikana tapi estu
jadi matak nambah nyari kana pribadina, da katambahan ku sonagar gaya
urang Amerika. Leuh bagja boga adi teh teu keuna ku kontaminasi, teu poho
kana jatidiri Sunda. Teu jiga umumna barudak ayeuna, sanajan can ka Amerika
meni geus asa pangamerikana sadunya, dina gaya dina basa,
estu matak pikaresepeun peureup.

Atuh anu leuwih bagjana, di ditu teh teu ukur tepung jeung Si Ayi
tapi jeung babaturan nu liana, nu biasa tepung di FB jiga Kang Agus Pakusarakan,
Teh Rahayu sareng Kang Aham katut garwana.( hanjakal teu tepung jeung Kang Godi
padahal mun tepung rek aya tanyakeuneun ka Si Akang teh, teu pira ukur hayang apal
kunaon ari Kang Godi, mun ngarang teh tokohna sok tina wayang! He..he..he….)

Anu matak helokna mah, kuring ditepungkeun jeung Ambu Mien!
Duh daek salamet teu nyangka eta teh Ambu. Da eta atuh bet
tebih tina sangkaan, gening ku seger, damis meni limit, geulis,
darehdeh misobat pisan, komara menak baheula. Eta meni apal
yen kuring guru ti Cimahi padahal di FB oge arang tepung ,
da nya eta kuring mah muka FB na sok sahayuna . Duh Ambu
asa teu percanten abdi mah yuswa Ambu tos 70 taun.

Bet jadi inget ka Uyutna barudak, umur 70 taun teh geus teu bisa ditanya bener,
da eta we mun dingetan solat pokna teh “ Ah da UU mah tos solat tepi ka isa” .
Singhoreng unggal solat teh disakalikeun kabeh dina solat subuh.
Ah dasar UU geus hilapan. Ari Ambu..bet teu aya harib-harib kana hilap ,
komo pikun mah, estu meni cerdas katingalna teh. Kumaha nya resepna
sangkan seger wae jiga Ambu…….Da jeung enyana pendak sareng Ambu mah
asa teuneung nyanghareupan mangsa nu bakal datang teh,
asa ku hayang ngalakonan umur 70 taun,
duh jiga kumaha nya kuring mun geus sayuswa Ambu?

Gusti teu nyangka kumelendang di alam maya teh gening janten seueur baraya.
Nuhun Gusti abdi tos ditepangkeun sareng sobat-sobat nu bareresih hatena…..,
hatur nuhun Ambu, Ayi Nety ,Kang Gibson sarta rerencangan sadayana
mugi Gusti ngawales kasaean sadayana ku kaasih sareng rahmat
anu ngocor salalawasna. Amiinnn….

Duh, asa dosa dina bulan Ramadhan anu geus nincak ka dua belas poe kuring can nulis dina blog, padahal bulan puasa teh keur kuring mah bulan anu kacida dianti-antina. Bulan anu pinuh ku magfiroh ceuk ajengan mah. Da jeung enyana, rijki teh dina bulan suci mah asa garampang pisan. Alhamdulillah.
Ngan nu rek ditulis didieu mah lain soal meunang rijkina, tapi rek nyoreang alam ka tukang, jaman kuring keur budak, lamun datang bulan puasa teh kacida pisan bagjana lantaran bisa ulin saseubeuhna da tara wani nyarek kolot ge ari keur bulan puasa mah.
Lah meni waraas, da nya eta kuring mah geus kawentar budak nalaktak jeung rada lenger, da eta we bisa puasa bener teh kakara umur 12 taun. Kacida pisannya. Beda jeung barudak ayeuna, kaasup anak kuring kakara di TK oge geus sina diajar puasa. Ngahaja ulah sina ngala ka indung!
Tah unggal datang bulan puasa, ilaharna barudak sok ngabuburit. Kitu deui kuring. Memeh ngabuburit sok ngabeubeurang heula. Euweuh deui ari ngabeubeurang teh sok sasapedahan tuluy ngarojay di gedung perdatam da didinya aya balong air mancur. Lamun teu kitu ngaheureuyan Si Macih nu gelo.Kungsi hiji waktu mah ningali Si Macih keur cacaleuhakan dahar ,tuluy ditanya kunaon teu puasa, eh jawabna teh apan Macih mah gelo cenah. Ari daharna teh jeung kurupuk, panasaran ditingalikeun, horeng beda ti batur. Mimitina sangu heula, sangu peren am kurupuk. Ceuk kuring teh, “ Macih lain kitu ari dahar. Kuduna mah am sangu am kurupuk. Eh kalah ngajawab, “ Ah….dipikiran teuing ke oge dina beuteung ngahiji!” Ih dasar nu teu hideng……
Beres buka kuring sabatur-batur bring ka masjid rek solat taraweh, kuring mah sholat taraweh teh sok nguriling ka masjid-masjid. Aya masjid Haji Uha, Ajengan Embun jeung sajabana, enya da baheula mah ngaran masjid teh sok dicokot tina ngaran kokolotna,teu jiga ayeuna ngaran masjid teh lain ku ngaran ajengan nu ngageugeuhna. Waasna teh unggal salat di masjid can ngajaran sakali oge bener, ngan ngagedekeun heureuy we, ari gegedug heureuyna teh nya eta Kang Epit ( Ayeuna mah geus jadi perwira pulisi manehna teh ) Eta we gera heureuy teh sok kamalinaan, geus puguh ngaganggu batur nu keur solat mah, ieu mah kolu ka wani nyumputkeun kolor ajengan sagala.
Eta kajadian teh dina malem lilikuran, pan biasa dina malem lilikuran mah ka masjid teh sok aya nu mere maweh, keur anu tadarus, biasana ti ibu-ibu sabudeureun masjid. Eusina teh rupa-rupa sabangsaning kueh-kueh karesep kolot jeung barudak. Tah kuring sabatur-batur ngakalan kumaha carana sangkan kabagian lalawuh, da nya eta ari tara tadarus mah boro-boro kabagean. Nya dina hiji waktu mah manggih akal ku cara nyumputkeun kolor ajengan.Kang Epit nu boga alpukah nyumputkeunana di jero bedug, kuring mah kabagean mareuman lampu masjid.
Atuh puguh barang beres solat teh ajengan kokotetengan neangan kolor bari bingung da lampu poek. Tah dina lebah kitu, barudak nu lain hideng nyokot tatampah eusi lalawuh tuluy dibawa ka markas. Ari markas teh pos ronda gigireun imah Bi Uti, teu jauh ti masjid. Geus kitu mah brak we dibuka bari teu weleh babarakatakan. Kungsi sakali waktu mah Pa RW naroskeun meunang milik ti mana barudak? Ti Haji Uha, ceuk barudak raeng, mangga Pa RW raosan, eh da eta mah Pa Rw oge pipilueun balakecrakan, da nya eta teu apaleun lalakonna. Dasar atuh nya ari keur budak. Padahal kuring sabatur-batur teh lain budak karurang dahar da di imah ge dahareun mah ngaleuya. Malah apan babaturan oge lain si itu si eta lolobana mah anak jelema pangkat tapi ari palebah nalaktak mah ngarana ge budak…Duh sok asa dosa ka kolot, pagawean ngan ngalieurkeun we kawas lain anak Kadis kuring teh…( Hapunten apa…)
Hiji waktu mah kuring sabatur-batur kungsi dicarekan sarta dibuburak ku Haji Uha,tuluy diancam teu meunang solat deui di masjidna lamun kalakuan teu bisa dirobah. Teu pira alatan solat nurutan manehna. Kieu dongengna teh, barudak teh teu bisa cicing, keur solat teh ngan heureuy we, eta tuda Si Rudy nu kitu tea mah, kalah der dimukena tuluy cicing di shaf awewe, meni pas pisan gigireun kuring, boro diantep da sugan teh Si Yayu adina. Ari pek si Rudy keur ngaheroan Uceu. Kulantaran barudak garandeng wae, nya Haji Uha anu jadi imam, ebat solatna. Tuluy muncereng ka barudak, hoak nyarekan bari ngulang-ngulang paneunggeul.” Hei barudak bangkawarah maraneh teh nya, lain solat kalahka heureuy! Solat sing bener!” Atuh puguh barudak reuwaseun. Ngan si Rudy nu wani ngajawab teh, kieu cenah ” Wa, nu kumaha ari solat nu leres teh?” ” Ih, dasar belegug, nya turutan aing atuh!” “Oooo… ceuk barudak meni raeng” Nya ti dinya mah sarolat we nurutan Haji Uha Ari Haji Uha teh ( Duh punten Uwa ) bongkok ti kudrat. Atuh barudak teh solatna bari murukukung. Keur anteng solat, hoak teh ti tukang aya nu nyarekan. ” Nanaonan maraneh teh sing bener atuh solat teh, piraku solat murukukung kitu! ” Nya ebat deui solat teh da kabeh ngaralieuk kana sora ti tukang, sing horeng Wa Dana.
Barudak reang nembalan, “Pan dipiwarang ku Haji Uha, solat teh kedah nurutan anjeunna”. ” Ehh lain gayana, tapi carana,gayana mah tong diturutan ,pan Haji Uha mah geus bongkok tikudrat” Kitu ceuk Wa Dana teh. Na ana gantawang teh Haji Uha nyarekan bari ngulang-ngulang paneunggeul ngusir kuring sabatur-batur kaluar ti masjid! Nya tungtungna mah bring we parindah ka masjid Ajengan Embun.
Duuuhh hapunten Wa Haji,ayeuna mah Wa Haji teh tos teu aya dikieuna atuh para sobat lilis, uce.heni, yanti sanusi, lucky, deden, rudy. yayu, dian, evi, yus jeung saha deui kuring geus paroho deui batur-batur saperjuangan ngaprak masjid, dimarana ayeuna? Meureun geus marawa nasib sewang-sewangan. Bulan puasa ayeuna umur kuring geus lain budak deui, tapi geus jadi indung, geus boga budak tilu.Pangalaman eta natrat terus dina hate. Kuring bagja mun inget kadinya, gening loba gunana jadi budak bangor teh nya. Enya bisa jadi eunteung keur kuring dina ngadidik barudak jeung murid-murid kuring. Tah keur anak-anak kuring mah, hususna Dika jeung Sony, kuring ngahaja rada nyarek solat taraweh di masjid ari lain bapana nu jadi imam. Maranehna sina solat di imah wae, sina piligenti diajar jaradi imam. Kuring ngamamum bari enggeusna sok ngomentaran sarta menerkeun bacaan anu salah atawa kurang jelas dibaca ku maranehna. Hasilna? Alhamdulillah kiwari barudak kuring anu dua geus biasa jadi imam. Mudah-mudahan Alloh ngaridoan kana cara kuring ngadidik barudak. Oge muga-muga Alloh ngahampura kalakuan kuring keur budak.

Teuing geus sabaraha lilana kuring wawuh jeung manehna, saha atuh manehna teh? Manehna nya manehna Ki Sobat nu aneh adatna
sompral basana, togmol sikepna tapi beresih hatena. Hanjakal mun pareng deukeut ngobrol teh tara kuat lila da kadituna pabentar
paham. Ngabasakeun oge tara ba..bi..bu atawa pa..pi ..pu.. tapi urang we jeung ente. Nya mun teu kitu nyebut ngaran atawa ‘ didinya’
Nyebut akang atawa Pa teh lamun hareupeun murid we, sarua manehna oge ka kuring kitu.

Anehna mun sapoe teu panggih, asa aya nu leungit. Eta da tuman idek liher di ruang guru, ngoprek komputer. Gera we, isuk-isuk
memeh ka kelas manehna geus campego hareupeun komputer muka FB. Badis we nu keur siduru di hawu.
Hiji waktu lamun teu salah mah bulan puasa harita teh ( bulan puasa nu geus kaliwat ) kuring keur anteng macaan puisi dina blog.
Gek manehna diuk gigireun. ” Keur naon? Awas siah ulah bobogohan bisi dibejakeun ka Pa Asep”
” Piraku kolot-kolot bobogohan, nyiar-nyiar pidorakaeun! Urang mah puguh keur maca puisi. Alus tah puisi teh jieunan Taufik Ismail!
Sok gera baca sugan we aya hikmahna!”
” Naon judulna?’
” Tuhan Sembilan Senti, ieu puisi ditujukeun keur nu sok ngaroko jiga Ente!” ceuk kuring
” Kumaha urang we, biwir- biwir urang!”
“Ah ilaing mah dipapatahan teh”
” Teu hayang dipapatahan ku jelema urang mah, komo ku Taufik Ismail wawuh ge henteu!”
” Ari geus hayang dipapatahan kusaha atuh? Sakitu geus jiga lokomotif butut teh!”
” Hayang dipapatahan ku Alloh” pok na teu euleum-euleum..

Isukna, pasosore babaturan hariweusweus pajar manehna utah uger di ruang IT. Sarerea tagiwur
bring maruru manehna. Cuh cih nareangan obat malah guru olah raga mah buru-buru nyiapkeun
mobil keur ngateurkeun manehna ka rumah sakit. Kuring mah anteng we hareupeun komputer
teu pipilueun riweuh, teu hayang nempo deuih. Guru-guru pating corowok ge ka kuring” Bu..itu
soulmate ngagoler moal dilongok? kuring ukur seuri leutik, tuluy we gura-giru balik…

Peutingna, panasaran nelepon manehna..Na ana gantawang teh nyarekan
” Nurustunjung gableg sobat teh, batur rek paeh teu nempo-nempo acan!’ manehna ngagarawak tina HP
” Lain teu hayang nempo, ngan sieun ngaganggu” ceuk kuring kalem
” Ngaganggu? Naon maksudna?”
” Apan Ente keur dipapatahan ku Alloh! Matak ayeuna nelepon teh kumaha geus kaharti acan?”
Manehna teu ngajawab ukur nyakakak.
Hampura…kuring hampura, teu pisan-pisan niat deleka… nu aya mah melang jeung nyaah ka
Ki Sobat nu satia nu ngarti kana jati diri kuring….

SINETRON

Adul : Lain euy dideuleu-deuleu ku urang, sinetron dina televisi teh asa ngacapruk teu puguh
Amin : Ngacapruk kumaha?
Adul : Heueuh eta gera tina jeujeur carita rumah tangga tuluy kana percintaan bet los kana jurig
Amin : Ari maneh, apan eta teh hiji ciri yen jelema jaman ayeuna mah , komo sabangsaning sutradara
produser, jeung artis,geus barosen jadi jelema. maranehna harayang jadi jurig.
Adul : Baruk kutan kitu nya? ari nu lalajona jiga uing?
Amin : Haarrr, pan maneh mah geus ti baheula jiga jurigna.
Adul : Si Sedul, dipepeg siah ku urang!

KAPAL UDARA , ANGKOT JEUNG KARETA API

Ucin : Ari kapal udara jeung kareta api gancangan mana?
Ado : Nya kareta api atuh
Ucin : Har naha?
Ado : Kareta api mah diganda lumpat bari ngorondang sakitu gancangna
komo mun bari nangtung.
Ucin : bener oge nya
Ado : Lamun aya angkot tabrakan jeung kareta api, saha tah nu salah
Ucin : Nya angkot atuh, da kareta api mah geus boga jalan sorangan
Ado : Ih nya nu nyaritana atuh nu salah mah. Geus puguh kareta api mah boga jalan sorangan
der dicaritakeun tabrakan jeung angkot.
Ucin : Ari maneh eling henteu? bet asa pabaliut kieu ngomong jeung maneh mah!

SI KABAYAN JEUNG BANG TOGAR

Hiji poe Si Kabayan pareng jalan-jalan ka Pasar baru kana beus kota. Naekna ti Cibeureum.
Ku kabeneran atuh dina jero beus teh diuk ngarendeng jeung Bang Togar anu sarua rek ka Pasar baru.
Barang beus mimiti maju, pok Si Kabayan ngagerenyem ‘ Bismillah…..’ cenah
Na ana pok teh Bang Togar gigireun nembalan ‘ Bukan bismillah ini mah bis kota!’
Si Kabayan ukur muncereng tapi teu ngajawab.

Palebah Gardujati, ger teh hujan gede naker jiga nu dicicikeun ti langit dibarung ku gelap dor-dar
atuh garawak Bang Togar ngagarawak ‘ Haleluyaaa..’ cenah. Na ana pok teh Si Kabayan teu eleh
ngagorowok. Lain haleluya nu kitu mah tapi Halilintar!
Hag siah bet teu nyarambung nya carita teh!

Pasososnten urang ngadaweung di buruan bari ngantosan Bi Ayum tukang dendeng ragi ngalangkung. Jol teh apa sumping mani rebo ku cacandakan. Sumpingna disarengan ku istri alit geulis camperenik tapi ginding. Ema sirikna dag-dag deg-deg mapagkeun apa. Kantenan waktos ngalinggihkeun mah meni sagala dikaluarkeun. Aya wajit, ranginang, bugis naon ku hanteu kaolahan Ema sadaya disuguhkeun ka istri candak apa tea. Tos kitu abdi dipiwarang munjungan bari kedah nyebat ibu. Asa araneh asa naringnang naha kedah nyebat ibu tapi abdi tumut we sakumaha kapalay ema. Bada magrib eta istri teh amitan.

Wengina kadangu Ema guntreng gunem catur sareng apa di tengah bumi. Naon anu dicarioskeun eces pisan kadangu ku abdi da teu acan sare. Morongkol harita teh dina korsi payuneun apa. Saur ema teh kieu ka apa
” Tong dibawa Si Nyai mah Jang!Keun bae jeung ema di dieu!”
” Ih ari Ema apan sakitu lamina abdi milarian piindungeun keur Si Nyai ari ayeuna geus kengeng kalah dihulag ulah dicandak. Apan bade disakolakun Si Nyai teh Ma” saur apa semu nyureng.
” Di dieu oge loba sakola mah, ema oge sanggup jujup jajapna”
” Ah…ngariripuh Ema bae, apan abdi oge bapana hayang milu nyaah”
” Kumaha lamun aya indungna kadieu nanyakeun Si Nyai? saur ema deui.
” Wah…Tong ngimpi Ma! Indungna jeung dulur-dulur ti indungna mah moal ingeteun! Budak geus teu diaku incu da bapana jalma kokoro, abong maranehna turunan menak!”
” Ih Ujang ulah kitu! Jeung urang teu hir teu walahir soteh da jeung Si Nyai mah sasat getihna keneh”
” Ih da abdi oge moal megatkeun hubungan indung jeung anak. Ngan engke wae mun Si Nyai geus sawawa rek didongengkeun”
” Tapi ema melang Ujang, mihapekeun Si Nyai ka indungna nu anyar. Jaba digawe deuih jeung apan sarua nu ieu oge turunan menak, naha atuh milih teh nu karitu bae lain nu sakupu jeung urang?”
” Ih ari ema, namina oge jodo tapi omat ema ulah cangcaya sanaos manehna menak palias abdi moal pisan nyalindung ka gelung. Manehna tos nyanggupan daek dibawa hirup sangsara.”
” Enya..tapi ema angger melang ka Si Nyai! Malum aya paribasa saherang-herangna cibeas”
” Insyaalloh Ma,manehna pasti nyaah ka Si Nyai. Genep taun abdi lalagasan piraku rek lepat milih. Sanes kubogoh- bogoh teuing abdi ka manehna teh tapi ku percaya kana pribadina yen manehna teh bakal nyaah ka Si Nyai, bakal bisa dijadikeun piindungeun Si Nyai”

Ema teu kadangu ngawaler deui ngan kakuping siga nu nangis. Jep we simpe. Duka pedah abdina kapulesan jigana da make jeung ngimpi ngala lauk di balong Mang Saman sagala harita teh.

Enjingna, rebun keneh ema tos popolah. Wanci haneut moyan abdi dicandak ku apa ka Bandung. Dijajap ku gupay ema. Dasar bolon atoh we nu aya da sugan teh bade pelesiran. Singhoreng ti harita urang paturay. Ah da mun seug apal mah jigana kajeun ceurik lolongseran tibatan pisan sareng ema.

Ema kacarioskeun di Bandungna apa teh gening ngontrak di bumina Wa Soma. Duka wargi ti saha Wa Soma teh. Istrina Wa Soma namina Wa Tiah. Apa sareng ibu mah nyebatna Kang Soma sareng Ceu Tiah bae. Aranjeunna gaduh putra hiji-hijina namina Kang Wardi. Sadayana nyaraaheun pisan ka abdi. Komo Kang Wardi mah nyaahna teh sami we sareng emang di bumi.

Hanjakal abdi teu betah cicing di Bandung da eta emut bae ka ema. Apan kungsi abdi kabur Ma. atuh salembur gujrud milarian. Kapendak-kapendak Ku Kang Wardi di pasar. Harita apa kacida benduna. Abdi disintreuk, nyeri teh Ma. Untung wae aya ibu. Ku ibu abdi dipangku teras diwurukan ulah deui-deui kabur bisi aya nu nyulik cenah. Ibu oge ngawartosan abdi bade disakolakeun. Tah pami liburan sakola, nembe abdi kengeng ka ema. Nya ti harita unggal abdi pere sakola abdi merenyeng hayang ka ema. Laahh kacipta keneh kumaha ema bagjana mun pareng abdi pere sakola.

Opat taun ti harita, enya asana mah da abdi ge kakara kelas opat harita teh, sataun ti saatosna apa syukuran ngadamel bumi di batas kota Cibeureum. Abdi nguping wartos ti apa, ema ngantunkeun. Abdi tangka ngorejat bakat ku teu percaya saatos sadar teras ceurik lolongseran teu tiasa dibebenjokeun. Dasar budak can boga pipikiran yen kitu peta teh salah, da kedahna mah abdi teh ulah ceurik kitu tapi kedah ngadoa malum atuh Ma namina ge bolon. Atuda hate teh meni asa didudut, komo barang katingal goloyorna layon ema anu bade dikurebkeun…Duh… bet tega ema ngantunkeun.

Saminggu abdi gering ngalanglayung asa leungiteun indung geusan pamuntangan. Kembang tanjung diburuan ngadadak janten muguran. Kitu deui malati katut ermawar nu pasalia jeung kacapiring katingal bet ngarangrangan daunna rabeng rag-ragan. Golodog tempat urang ngadaweung duaan mung kantun waasna.

Duh ema, ku seueur atuh panineungan sareng ema teh. hanjakal ayeuna ema tos teu aya dikieuna. Ema teu nyaksian kumaha abdi sareng apa ayeuna. Doa Ema hoyong gaduh anak incu waluya teh diijabah ku Mantenna.

Ema, asa hoyong panjang keneh nyacapkeun kasono dina implengan teh. Ngan ieu panon abdi tos teu kiat ku murubutna cisoca. Asa aya wae Ema nalingakeun ti kalanggengan. Imut pinuh ku kabagjaan. Ah mugia wae Ema ditampi iman islamna ditempatkeun di tempat anu pangsae-saena. Amiinn.

Wilujeng wengi Ema, kumaha damang?
Ieu kuring nyaring tengah peuting, bet jorojoy emut ka ema. Tapi ka mana
atuh milarina? Iwal ti ceurik na pangsujudan munajat ka nu Maha Agung
mugi Ema aya dina rahmat Anjeunna.

Duh Ema, ieu hate bet teu kuat hayang tepung, asa cikeneh Ema teh jumeneng
asa cikeneh urang teh ngaronce kembang eros jeung malati pelak ema nu tara
liren kembangan, bari calik ngahariring dina bangbarung, ngarumbay tineung.
Atuh lamun pareng caang bulan, Ema sok ngahaja ngamandian abdi ku cai
kembang. Pajar teh ambeh gede milik cenah, ambeh seungit siga kembang.
Dasar bolon, abdi teh nurut we dikua kieu ku ema teh, malah atoh we nu aya,
nyoo cai bari ningali bulan. Anehna teh naha teu lebet anginnya Ma?

Ema, emut henteu basa pasosonten abdi ngarenghik hoyong lele?
Katingal Ema siga nu bingung, enya atuda lele ti mana da Ema mah
teu gaduh balong. Miwarang emang sina nguseup ka susukan,
emang kalahka bendu. Saurna teh, ” Tong diogo teuing Ma,
Si Nyai teh! Bisi unggah adat!Barina oge usum caah kieu rek nguseup
lele kumaha!” Harita Ema calik teu ngawaler, panangan anteng ngusapan
sirah abdi nu keur ceurik na dada Ema. Diupah-apeh, diolo teu daek repeh
nepi ka reupna dina pangkonan ema.

Enjing-enjing ema ngaguyah-guyah abdi nu tibra keneh. Ema ngharewos
ditompokkeun kana cepil, saur ema teh, ” Nyai, gugah geulis, itu tingali
di buruan aya naon” Abdi nguliat bari rucang - riceung lulungu teras
ditungtun ku ema diajak ka buruan. Manawi teh aya naon, singhoreng
aya lele ageung ampir sami sareng leungeun abdi, ngagoler di buruan
handapeun tangkal manalika. Sigana lele kacandak caah ti balong
Mang Saman, da wengina hujan meni ngagebret pisan.

Abdi teu sirikna ajrag-ajragan bawaning ku atoh, atuh pameunteu ema
katingal marahmay. Si lele ku ema dipeuncit, diberesihan dibungbuan
uyah koneng, jahe, bawang bodas sareng katuncar teras digoreng,
seungitna angin-anginan.

Eta deuih ema, emut keneh henteu basa abdi pasea sareng Nyi Imas?
Muhun harita teh ema nuju ngider icalan kopi ka lembur tonggoheun
lembur urang tea gening ma, abdi ku ema diwiatkeun ka uwa.
Tah harita teh abdi nuju anteng anjang-anjangan dina golodog
torojol Nyi Imas putra uwa, ngajak ulin sasalimpetan. Ari abdi alim,
na ana gubrag teh dadagangan abdi dibeubeutkeun tangka patulayah.
Puguh atuh abdi ambek, der pasea teras garelut. Sirah abdi didagorkeun
kana pago. Dina pago aya bedog mintul, habek eta bedog ku abdi
ditakolkeun kana tarang Nyi Imas. Uluh gening sanajan bedog mintul, ari
ditakolkeun kana tarang mah teu burung jontowor.

Abdi harita reuwas kacida ningali Nyi Imas kakawawakan bari getih
ulaweran tina tarangna, uwa tangka tibuburanjat. Ngarawu Nyi Imas,
bari langsung dicandak ka Mantri Eman. Cenah mah disuntik sagala
ku Mantri Eman teh. Ari abdi da sieun tea, teras nyumput di kolong.
Dugi ka wanci magrib abdi teu kaluar-luar. Abdi terang harita ema
kokotetengan milari abdi. Kitu deui emang. Ari uwa sanes milarian,
kalahka kukulutus bae, bari pok na teh ” Bangkawarah pisan
Si Nyai teh Ma, antep wae tong diteangan, keun sina dilebok tetelo!
Bongan harak ka Si Nyimas!”

Ema, sigana lamun Si Burik hayam kadeudeuh abdi, teu gagarapakan mah,
abdi teh moal kapendak ku ema. Jongjon wae meureun nyumput di kolong.
Si Burik gagarapakan bari teu eureun kokotak, atuh ema lunga-lengo ka kolong,
nyampak aya abdi keur murungkut. Abdi teu sirikna dirawu dipangku,
digalentoran ku ema bari nangis. Tos kitu teras dipangku ka jamban diibakan.
Beres ibak, diacukan, dicalikeun dina korsi bari diwurukan ku ema su
paya ulah deui-deui pasea. ” Kudu nyaah ka dulur!” Kitu saur ema teh
bari teu weleh ngusapan deudeuh pisan.

Duh Ema, sakumaha abdi bangor, gening ema mah tetep deudeuh mikaasih.
Atuh ti harita abdi tara dikantunkeun deui ku ema. Abdi sok dicandak ngider
dagang kopi ngurilingan lembur. Uihna sok nyimpang heula ka Babah Kicu
balanja kopi sangrayeun. Ari Si Babah, gaduh budak lalaki saluhureun abdi,
Si Atam namina. Sok ulungah-elengeh bae mun pareng pasangrok teh, ih
sumpah abdi mah cua ka manehna teh padahal naon dosana Atam nya Ma?.
( Lajengkeuneun………..)