Lembur Kuring Karang Pamidangan

SINANGLING KAKALAKAYAN

bulan moncorong beh wetan
cahayana ngempur na dada…

nu dianti datang ti luhur….
rongheap ti jero dada
digupay dibageakeun…
tos datang disaha-saha….

samagaha ngungudag rasa
bulan dicindung mega warna kulawu
sinangling kakalakayan….

Februari 29, 2008

Filed under: Curahan Kalbu

CARITA DINA SAJAK

Aya hariring na hate kuring
Galindengna parat mapay peuting
Mepende hate nu simpe

Duh jungjunan
Naha anjeun, mentangkeun jamparing asih lain wanci

Ulah kitu, urang ulah nyieun carita dina sajak
Bisi aya cak-cak bodas,nguar-nguar jadi sasakala
Malum sifatna jalma
Padahal urang mah maya

CEUK ANJEUN

Kuring kungsi tumanya
Kunaon kecap cinta jeung deudeuh
Sok murudul di dunya maya?

Ih, atuda naon hesena, tiba nulis!
Kitu ceuk anjeun harita

Eta jawaban, natrat pageuh dina hate
Nepi ka ayeuna, keun keur sampeureun jaga
Bisi hiji waktu aya jamparing asih
Nu nyasar nembus ka kuring
Tah eta teh, tiba carita
Sakumaha ceuk anjeun tea

SAJAK KURING

Sajak kuring sajak keur anjeun
Nu kaluar tina galura rasa
Pek ku anjeun gera titenan

Sajak kuring sajak keur anjeun
Nu didangding na jemplingna peuting
Na gelikna sora suling jeung jentrengna kacapi asih

Sajak kuring sajak keur anjeun
Haturan tilam katineung
Keur maturan nu teuneung ludeung
Ngumbara di nagara deungeun
Sajak kuring sajak keur anjeun
Teundeun dina handeuleum, tunda dina hanjuang
Bisi anjeun pareng ninggalkeun

January 25, 2006
CIKA-CIKA
Filed under: Puisi Ku

Cika-cika tingkaretip di buruan
keur budak mah, kuring sok keueung
sabab ceuk nini
eta teh kuku jurig ti jarian

Cika-cika ting karetip na hate kuring
ulah sieun ceuk nini
eta teh batur, keur nyaangan batin urang
Comments (0)
ANJEUN
Filed under: Puisi Ku

Basa kuring balik burit
Anjeun teu loba carita
bangun surti

Basa kuring wakca
Anjeun teu loba tatanya
ukur kemba

tapi kuring surti
dina dada anjeun aya nu ngagalura
basa kuring wakca nyarita
aya sakura di Osaka
nu panggih di dunya maya

Hampura , rumasa kuring rumasa
rumasa geus katalimbeng rasa
tapi palias
kuring moal rek midua
ngan anjeun pamageuh rasa

ANJEUN

Anjeun lir balebat, nu datang sok sajorelat
Teuing ti mana anjeun asalna, sarta di mana anjeun ayana
Naha di cakrawala megantara di mayapada, atawa di buana
Niskalawastukancana?

Duh, teuing kumaha anjeun teh jirimna, naha jiga Arjuna
Bima atawa Roby Sugara? Palias jiga Rahwana! Ah nu jelas
anjeun cicing na hate kuring, lir angin ririh nu tingtrim
Ngadalingding, nyambuangkeun seungit kembang. Malati
jeung sedep malem nu ligar di pakarangan, pakarangan
hate kuring.